Петропавлда Конституция көшесін жаңғыртудың екінші кезеңі басталды. Қазір облыс орталығында ауқымды абаттандыру жұмыстары жүріп жатыр. Мамандар негізгі жұмыстарды жаздың ортасына дейін аяқтауды жоспарлап отыр. Бүгінде жұмысшылар инженерлік желілерді ауыстыруға және жабындыны жаңартуға дайындық жасап жатыр, деп жазады Qazaqstan Media.

Бас көшеге амфитеатр орнатылады

Облыс әкімі Ғауез Нұрмұхамбетов жобалаушылармен бірге болашақ өзгерістерді талқылады. Жоба аясында өлкетану музейінің маңындағы ескі брусчатка толық ауыстырылып, оның орнына ерекше өрнегі бар заманауи жабын төселеді. Дизайнерлер бұл аумаққа «музыкалық сызықтар» тұжырымдамасын ұсынған.  «Мирас Group» ЖШС-нің дизайнері Надежда Седнева бұл шешім кеңістікті кеңірек әрі әсерлі етіп көрсететінін айтты.

«Біз жалпы жолақты тұжырымдаманы сақтаймыз, бірақ оған көбірек динамика қосамыз. Бұл жер музейлік әрі музыкалық кеңістік болғандықтан, ол жанды болуы тиіс. Біз жазықтықта әртүрлі сызықтарды алмастырып орналастырамыз, соның арқасында жоғарыдан қарағанда өте әсерлі көрініс пайда болады», — деді «Мирас Group» ЖШС дизайнері Надежда Седнева.

Жоба бойынша Конституция көшесінде жаңа орындықтар, заманауи әткеншектер және қалың көгалдандырылған демалыс аймақтары пайда болады. Ағаштардың айналасына арнайы ағаш төсемдер орнатылып, тұрғындар онда отырып демала алады. Кейбір жерлерде ағаштар ортақ отыратын аймақтармен біріктіріледі. Барлық абаттандыру элементтері кешкі серуенге қолайлы болу үшін жарықпен жабдықталады.

Қалалық әкімдік алдындағы орталық алаңда 150 орындық мобильді амфитеатр орнатылады. Бұл конструкция қажет болған жағдайда бөлшектеліп, алаңның басқа бөлігіне көшіріле алады. Сонымен қатар билік бұрын көшенің дайын бөлігінде қойылған дөңгелек пішінді әткеншектерді көбейтуді ұсынып отыр. Олар балалар мен ересектер арасында сұранысқа ие болған.

Жоспарға жарықтандыру жүйесін жаңарту да енгізілген. Ескі шамдар заманауи жарық құралдарына ауыстырылып, бұрынғы жарық бағаналары қаланың скверлеріне орнатылады. Алаңдағы жұмыстар аяқталған соң билік Подгора шағынауданындағы жағалауды және Ущев бөгетіндегі жаяу жүргіншілер жолын абаттандыруға кіріспек.

Көпқабатты үйлердің қасбеті де өзгереді

Биыл құрылыс жұмыстары Парк көшесінен Назарбаев көшесіне дейінгі аралықта жүреді. Жобаға сегіз көпқабатты тұрғын үйдің қасбетін жаңарту да енгізілген. Осы мақсатта қалада арнайы өндіріс іске қосылған. Мердігер Кожзавод ауданынан цех жалдап, қаптау материалдарын өзі шығара бастады. Бұл құрылыс қарқынын жеделдетіп, сапаны бақылауды күшейтуге мүмкіндік береді.

«Қызылжар Құрылыс» ЖШС директорының орынбасары Станислав Набоковтың айтуынша, қолданылатын материалдар он жылдан астам уақыт қызмет етеді.

«Біздің материалдардың қызмет ету мерзімі он жылдан асады. Біз жоғары тығыздықтағы пенопластты қолданамыз және оның үстіне жұмсақ қорғаныш қабатын жағамыз. Содан кейін екі қабат травертин төсеп, барлығын арнайы лакпен жабамыз. Мұндай әрлеу өте берік, уақыт өте келе қабырғадан ажырап кетпейді», — деді «Қызылжар Құрылыс» ЖШС директорының орынбасары Станислав Набоков.

Ғимараттардың қапталындағы ескі баннерлер мен жарнамалар алынып тасталады. Маманның айтуынша, әрбір терезе декоративті элементтермен әрленіп, балкондарға шатырға дейін жететін арнайы карниздер орнатылады. Жаңа қаптау технологиясы тек сыртқы келбетті жақсартып қоймай, жылуды да жақсы сақтауға мүмкіндік береді. Компания бұған дейін осындай жұмыстарды Қостанай облысында жүргізген. Өткен жылдардағы тәжірибе мұндай материалдардың қатаң қыс жағдайында тиімді екенін көрсеткен. Құрылысшылар барлық жұмысты екі ай ішінде аяқтауды жоспарлап отыр.

Тағы оқыңыз: СҚО-да дала өртін тікұшақпен сөндіріп жатыр