Енді қазақстандық колледж студенттері оқып жүріп ақша таба алады. Яғни, қыз-жігіттер оқу орнында өздері дайындаған өнімдерді сату мүмкіндігіне ие болды. Мұндай жаңалықты ҚР Оқу-ағарту министрлігінің баспасөз қызметі жариялады, деп хабарлайды Qazaqstan Media тілшісі.
Министрліктің баспасөз қызметінің мәліметінше, қазіргі уақытта 446 мемлекеттік колледждің 97-сі оқу-өндірістік шеберханаларда шығарылатын өз өндірісінің тауарларын сатуда. Бұл жиһаз, тігін және дәнекерлеу өндірісі, сонымен қатар басқа да авторлық өнімдер.
«Мысалы, Көкшетау қаласының жоғары техникалық колледжінің базасында 10 құзырет орталығы табысты жұмыс істей бастады. Оларда әлеуметтік серіктестердің тапсырысы бойынша 243 қызмет түрінен өндірістік тапсырыстар дайындалады. Оның ішінде сандық бағдарламамен басқарылатын станоктарында металды токарлық және фрезерлік өңдеу, тігін қызметтері, жеңіл автомобильдерді жөндеу және қызмет көрсету қызметтері, шанақты жөндеу, аула ойын алаңдары, саябақ дүкендері, жарықтандыру шамдары, урналар мен қоқыс контейнерлері кешенін дайындау. Колледж қаланың 45-тен астам ірі кәсіпорындарымен ынтымақтасады, онда мыңнан астам студент жұмыс істейді. Олардың жалақысы орта есеппен 50 — ден 100 мың теңгеге дейін», — деді Техникалық және кәсіптік білім департаменті басқармасының басшысы Алмас Жұмабеков.
Қоса кетсек, бүгінде 2083 қазақстандық студент пен 439 педагог өз өндірісінің тауарларын сату есебінен ақы мен үстемақы алды.
Тағы оқыңыз: Елімізде көктемгі аң аулау маусымы басталды
