Солтүстік Қазақстан облысында әдеп жөніндегі кеңестің кезекті отырысы өтті. Онда орындалмаған жұмыс үшін ақша төлеп қойған ауыл әкімінің ісі қаралды, деп хабарлайды Qazaqstan Media.
Былтыр қараша айының басында Уәлиханов ауданы Кішкенекөл ауылдық округінің әкімі Сәлима Әбікеева елді мекенде бейне бақылау жүйесін орнату үшін кәсіпкермен келісімшарт жасасқан. 13 камераны орнатуға 5,1 млн теңге қаржы қарастырылған. Жұмыстарды серіктестік жыл соңында аяқтауы тиіс еді. Алайда биыл 6 қаңтарда прокуратура органдарды тексеріс жүргізгенде бар болғаны екі камера ғана жұмыс істейтін болып шықты.
«Ал құжаттарға сай 2024 жылдың 13 желтоқсанында жұмысты тексерместен ауыл әкімі Сәлима Әбікеева актіге қол қойып, серіктестікке 3 млн 571 мың теңге қаржыны аударған. Жүргізілген қызметтік тексеріс барысында шенеунік бұл қаржы толық емес жұмыс көлемі үшін төленді деп ақталды», — СҚО Мемлекеттік қызмет істері департаменті мемлекеттік қызмет саласындағы бақылау басқармасының бас маманы Диана Салғарина.
Мемлекеттік қызметке кір келтірген ауыл әкімінің өзі әдеп жөніндегі кеңестің отырысына келмеді. Комиссия мүшелері оған «қызметіне толық сай емес» деген ескерту жасауды ұсынды.
Айта кетейік, Сәлима Әбікееваның ауыл әкімі болып тағайындалғанына бір жылға жуық уақыт қана болған. Осы уақытқа дейін ол тәртіптік жауапкершілікке тартылмаған.
Тағы оқыңыз: Петропавлдық қоғам белсенділері IV Ұлттық құрылтайда айтылған бастамаларды талқылады
