Павлодар қаласында бәйгеден ҚР чемпионатының сегізінші кезеңі әрі осы күзде Астанада өтетін V-ші Дүниежүзілік көшпенділер ойындарына іріктеу өтті. Дүбірлі додаға еліміздің барлық өңірінен 90-нан астам тұлпар қатысты, деп жазады Qazaqstan Media тілшісі.
Жарыс бәйгенің төрт түрі бойынша өтті: құнан бәйге, топ бәйге, жорға жарыс және аламан бәйге. Жалпы жүлде қоры — 24 900 000 теңге.
«Бұл бәсеке — бәйгеден ҚР чемпионатының 8-кезеңі, ал бір жағынан осы күзде Астанада өтетін 5-ші Дүниежүзілік көшпенділер ойындарына іріктеу есебінде өтіп жатыр. Ат жарысқа еліміздің түкпір түкпірінен ең үздік жылқылар жиналды.Әр бәйге түріне шамамен 25 тұлпар қатысып жатыр. Бұл аттардың жағдайы жақсы, алдағы үлкен додаға дайын деп айта аламын», — деді «Бәйге» федерациясының атқарушы директоры Алтай Бимен.
Құнан бәйгеден бірінші орын алған Қамысқұлақ атты тұлпардың шабандозы Асланбек Абдықал жеңіс жолында бапкердің кеңесі көмек болғанын айтады.
«Бапкердің айтуымен жүріп отырдым. Ол маған жарыс бастала сала алдыңғы топта отыруға кеңес берді. Соңғы айналымда бірінші болып алға оздым. Мәреге бес жүз метр қалғанда артымнан тағы бір ат келе жатты. Жетіп ала ма деп қорқып едім, бірақ мен бірінші келдім. Енді көшпенділер ойындарына дайындаламын», — деп атап өтті жас шабандоз Асланбек Абдықал.
II орынды Найза атты құнан алды, шабандозы Арнат Мұратхан. Жүлдегерлер үштігін Айшуақ есімді атқа мінген Аңсар Арыстанбек тәмамдады.
Топ бәйгеде Ғасыр атты сәйгүлік, Алихан Жәнібекұлын есімді шабандозымен үздік атанды. II орынды Равшан, шабандозы Ділнұр Нұрмұқаш иеленді. ІІІ орынды шабандоз Қаиржан Әлихан Тәуекел атты тұлпарымен жеңіп алды.
Жорға жарыс қорытындысына келсек: I орынды иеленген Орда, шабандозы Юрий Лымарь. II орын Выпуск, шабандозы Ануарбек Абдрахманов. III орын Ақжауын, шабандозы Ербұлан Тілеғалиұлы.
Аламан бәйге нәтижесі бойынша — І орынды Софлор Лэнд есімді айғыр иеленді, шатббандозы Амир Аманұлы, ІІ орынды Береке есімді жылқы, шабандозы Иринат Санжармен жеңіп алды. ІІІ орында Шайкүрең атты тұлпар шабандозы Арнат Мұратхан.
Тағы оқыңыз: СҚО-да жүк көліктерін автоматты өлшеу жүйесі орнатылады
