Явленка ауылының орталық алаңы халықтық мерекенің думан ордасына айналды. Есіл ауданының тұрғындары мен қонақтары Наурызды ән-жырмен, ұлттық ойындармен және мол дастарқанмен қарсы алды. Ұлыстың ұлы күні баршаға көктемнің шуақты көңіл күйін сыйлап, үлкен мен кішіні бір арнаға тоғыстырды, деп жазады Qazaqstan Media.

Қыдыр ата батасы

Мерекелік думан аудан орталығының қақ жүрегінде өтті. Мұнда этноауылдар тігіліп, концерттік алаң мен дәм ұсынатын арнайы аймақтар ұйымдастырылды.

Ежелгі дәстүрге сай Явленканың орталық алаңына Қыдыр ата келді. Бұл көпшілікке көне аңызды еске салған ерекше сәт болды. Аңыз бойынша, бақ-береке, ырыс пен саулық сыйлайтын ақсақал адам бейнесіне еніп, ел арасына білдірмей келуі мүмкін. Сондықтан жұрт Қыдыр атамен қол алысу жыл бойы бақ пен береке әкеледі деп сенеді.

Есіл ауданының тұрғындарына алғаш болып жылы лебізін Солтүстік Қазақстан облысының әкімі Ғауез Нұрмұхамбетов арнады. Ол Наурыздың ел үшін айрықша мәні барын, халықты бірлік пен ынтымаққа ұйыстыратын мейрам екенін атап өтті. Өз сөзінде өңір басшысы бұл мерекенің қоғам өміріндегі орнына кеңінен тоқталды. Соңғы жылдары Наурыздың ауқымы кеңейіп, жоғары деңгейде өтіп келе жатқанын айтты.

Әсіресе, биыл облыстық ашылу салтанатының алғаш рет ауылдық жерде ұйымдастырылып отырғанына ерекше назар аударды.

«Баршаңызды Наурыз мерекесімен шын жүректен құттықтаймын. Бұл күн — жаңару мен жаңа өмірдің бастауы, табиғаттың қайта түлеуінің белгісі. Халқымыз оны ежелден жақсылықтың, бейбітшіліктің және жасампаздықтың мерекесі деп таныған. Биыл облыстық ашылуды ауылдық жерде өткізіп отырмыз. Бұл — ауылдарды дамытуға деген айрықша көңіл бөлінгенін көрсететін жаңа формат. Енді ауыл тұрғындары да үлкен мерекенің бір бөлігіне айналады. Алда бізді игі өзгерістер мен жаңа жетістіктер күтіп тұрғанына сенімдімін», — деді өңір басшысы Ғауез Нұрмұхамбетов.

Сахна төрінде аудандық мәдениет үйінің және Ақан сері атындағы облыстық филармонияның өнерпаздары өнер көрсетті. Олар түрлі тілде ән шырқап, халық билерін орындады. Сондай-ақ алаңда қыран құстарын баптаған епті бүркітшілер мен тазы иттерді де тамашалауға мүмкіндік болды.

Мерекелік жәрмеңке

Бұдан бөлек, таң атқаннан бастап алаңда ауыл шаруашылығы жәрмеңкесі қызды. Аудан фермерлері мұнда бал, жұмыртқа, ет және сүт өнімдерін әкелді. Тауар бағасы нарықтан 25 пайызға төмен. Сондықтан өнімдер тез арада сатылып кетті. Корнеев ауылдық округінің делегациясы жәрмеңкеге табиғи өнімдердің мол түрін ұсынды.

«Бүгін біз сүт өнімдерін — сүзбе, сүт, қаймақ әкелдік. Сонымен қатар жұмыртқа мен 20 үй қазысының ұшасы бар. Біздің жергілікті кәсіпкер сапалы бұқтырылған ет пен банкідегі ботқаларды әзірлейді. Сауда жақсы жүріп жатыр, қазірдің өзінде тауарымыздың басым бөлігін сатып үлгердік. Бағаларымыз қолжетімді. Мәселен, қаз етінің бір келісі 2 300 теңге тұрады», — деді Корнеев ауылдық округінің әкімі Григорий Зимарев.

Петров ауылдық округі де өз жерінің берекесін ала келді. Петровка, Мәдениет және Бірлік ауылдарының тұрғындары қонақтарға арнап балғын өнімдерін ұсынды.

«Бүгін біз сатып алушыларға қой еті, сүт, қаймақ, сүзбе және май ұсынып отырмыз. Салмағы шамамен 25 келі болатын тұтас қой етін әкелдік. Сауда жақсы жүріп жатыр, өйткені бағаларымыз нарықтан төмен. Бір литр сүт 250 теңге, картоп 100 теңге, ал жұмыртқа 450 теңге тұрады. Бәрінің көңіл күйі көтеріңкі», — деді Петров ауылдық округінің әкімі Оралбек Қонқабаев.

Қолөнер көрмесінде қонақтар сапалы ат әбзелдерін тамашалады. Кәсіпкер Владимир Осипов пен оның ұжымы ер-тоқым, өмілдірік, жүген және ноқта секілді бұйымдарын көпшілік назарына ұсынды. Сонымен қатар бұл жерде тізгін, қамшы және үзеңгі де сатылды.

«Барлық бұйымды табиғи былғарыдан қолмен жасаймыз. Бір ер-тоқым не жүген әзірлеуге орта есеппен екі күн кетеді. Ұжымымызда 15 адам еңбек етеді. Петропавлда он жылдан астам уақыттан бері жұмыс істеп келеміз. Өнімді өзіміз шығарып, оны Қазақстанның түкпір-түкпіріне және интернет алаңдары арқылы сатамыз. Біз — тікелей өндірушіміз және тауар сапасына толық жауап береміз», — деді кәсіпорын өкілі Болат Қуанышбаев.

Басқа өңірлерден келген шеберлер де өздерінің бірегей бұйымдарын ала келді. Солардың бірі — Түменнен арнайы келген Салтанат Исаева. Ол Явленкадағы Наурыз мерекесінде құрақ құрау тәсілімен тігілген қолөнер туындыларын таныстырды. Негізінен бұл — ұлттық нақыштағы қолдан жасалған құрақ көрпелер болды.

«Мұндай ыстық ықыласқа өте ризамын. Алматы мен Ақтөбедегі мықты шеберлерден үнемі үйреніп жүремін. Бұйымдарым әрдайым заман ағымына сай келеді. Өз жұмысымның сапасына толық кепілдік беремін. Бүгінгі мереке маған өте ұнады. Баршаңызға өсіп-өркендеу мен бақ-береке тілеймін», — деді Салтанат Исаева.

Алаңда аспаздық аймақ та жұмыс істеді. Онда ауылдық округтердің тұрғындары жұртшылықты бауырсақ, самса, палау, мәнті секілді түрлі тағамдармен сыйлады. 

Жұртшылық мереке аяқталғаннан кейін де көпке дейін тарамай, бір-бірін көктемнің келуімен, Ұлыстың ұлы күнімен құттықтап жатты.

Тағы оқыңыз: Петропавлда Наурыз мерекесі ерекше форматта аталып өтті