Есіл ауданындағы Еңбек ауылының тұрғындарының көптен күткен арманы орындалды. Елді мекенде 50 орындық жаңа бастауыш мектеп ашылды. Енді балалар оқу үшін күн сайын көрші ауылдарға бармайды. Ғимарат «Бай Еңбек» ЖШС директоры, меценат Қайырбек Қожасовтың қаражатына салынды. Білім ұясының қолданысқа берілуі ауыл тұрғындары үшін үлкен сый болды, деп хабарлайды Qazaqstan Media.
Солтүстік Қазақстан облысының Есіл ауданында жаңа білім беру мекемесі ашылды. Бұл ауыл тұрғындары үшін маңызды оқиға болып саналады. Себебі, бұған дейін жергілікті балалар Явленка мен Покровка ауылдарына барып оқитын.
Ұйымдастырылған тасымал болғанымен, жол көп уақыт пен күш алатын. Енді балалар ата-анасының жанында, өз ауылында білім ала алады.Салтанатты шараға ауыл тұрғындары, Солтүстік Қазақстан облысының әкімі Ғауез Нұрмұхамбетов, Есіл ауданының әкімі Мереке Мұхамедияров және қоғам белсенділері қатысты.
Ашылу рәсімінен кейін барлығына мектеп бойынша экскурсия өткізілді. Облыс әкімі оқу сыныптарын, спорт залын және даярлық тобын қарап шығып, құрылыс және әрлеу жұмыстарының сапасын тексерді. Ғауез Нұрмұхамбетов ғимараттың заманауи талаптарға толық сай келетін жоғары деңгейде салынғанын атап өтті. Оның айтуынша, мұндай бастамалар құрметке әрі қолдауға лайық. Себебі бұл ауылдарды дамытуға және балаларға қолайлы жағдай жасауға көмектеседі.
Жаңа оқу орнына өңір басшысы интерактивті тақта сыйға тартты. Мектеп ауылдың тумасы, «Бай Еңбек» ЖШС директоры Қайырбек Қожасовтың жеке қаражатына салынды. Ол ғимарат құрылысына 350 миллион теңге жұмсады.
«Мектептің іргетасы 15 мамырда қаланып, 2 маусымда оған болашақ капсуласы салынды. Жаңа нысан туған жерге деген қамқорлық пен ауылдық аймақтарды дамытуға ұмтылыстың символына айналды», – деді аудан әкімдігі.
Ғимаратта төрт оқу сыныбы мен даярлық тобы бар. Әр кабинет өз түс гаммасында безендірілген. Мектепте спорт залы, заманауи жиһаз және оқу материалдарының толық жиынтығы бар.
Мұнда төрт мұғалім және 11 техникалық қызметкер жұмыс істейді. Барлығы — Еңбек ауылының тұрғындары.
Есіл ауданы әкімдігінде бұл әрекетті нағыз патриотизм мен балалар болашағына деген қамқорлықтың үлгісі деп атады.
Тағы оқыңыз: Петропавлда құрылыс жұмысы кезінде ер адамның құлақ сыртына шеге қадалған
