Есіл ауданындағы тағы бір ауыл орталықтандырылған сумен қамтылды
Есіл ауданындағы Бірлік ауылында көптен күткен оқиға орын алды. Елдімекенде ауыз сумен жабдықтау жүйесі ресми түрде іске қосылды, деп хабарлайды Qazaqstan Media.
Таза тіршілік көзін тарататын нысан 1 жылдың ішінде салынды. Құрылысқа Бас прокуратураның мемлекетке қайтарылған активтері есебінен де қаржы бөлінген.
Есіл ауданындағы тағы бір ауыл орталықтандырылған сумен қамтылды
«15 шақырым су құбыры тартылды, оның 6 шақырымы ауылдың іші арқылы өтеді, іске 618 млн теңге жұмсалды. Сіздердің көптен күткен тілектеріңіз орындалды. Ауданда бұл бағытта жұмыстар жалғаса береді», — Есіл ауданының әкімі Мереке Мұхамедияров.
Берекесі артқан Бірлік ауылында қазір 150-ге жуық адам тұрады. Олардың барлығы тіршілік көзін үйге кіргізген. Ілкімді іс Петровка ауылдық округінде атқарылды. Биыл мұнда біршама шаруа тындырылыпты.
Есіл ауданындағы Петровка ауылдық округіне 3 ауыл кіреді. Бүгінде елдімекендердің барлығындағы үйлерге таза су кіргізілген.
