Өңірде 2 мың-нан астам студентке жатақханадан орын тапшы. Бұл мәселені шешу үшін облыс орталығында 1750 орынға шақталған 3 жатақхана салынып жатыр, деп хабарлайды Qazaqstan Media тілшісі
Петропавлда М.Қозыбаев университетінің студенттер үшін 306 орынға шақталған жатақхананың құрылысы 2019-шы жылы басталған. Қазір ауқымды жұмыс аяқталуға шақ. Мекеменің бірінші қабаты АҚШ-тан келген оқытушыларға арналған. Мамандар Қозыбаев пен Аризона университеті арасындағы әріптестік аясында студенттерге сабақ береді. Бір бөлмеде 3 адамнан тұратын болады. Бір ас үй пен жуыну бөлмесін екі бөлменің тұрғындары пайдаланады.
«Бір шаршы метріне — 290 мың теңге. 15 қазанға дейін нысанды тапсыруды жоспарлап отырмыз. Қазіргі уақытта әрлеу жұмыстары жүргізілуде. Линолеум төсеп, төбелерді тарту керек.»,-дейді СҚО құрылыс, сәулет және қала құрылысы басқармасының басшысы Қайролла Ғалеев.
Қазір жатақханаға деген қажеттілік 2300 орынды құрайды. Жыл сайын ауылдар мен өзге қалалардан келген студенттердің саны артып жатыр екен.
