Жаңа оқу жылы қарсаңында мұғалімдердің дәстүрлі тамыз кеңесі Тимирязев ауданында да өтті. Оған аудан әкімі Ерлан Жаров қатысты, деп жазады Qazaqstan Media.
Тимирязев ауданының әкімі Ерлан Жаров тамыз кеңесінде білім саласындағы жетістіктер және алдағы оқу жылына арналған жоспарлар туралы айтып берді.
«Білім беру сапасының маңызды көрсеткіші — түлектердің жоғары оқу орындарына түсуі. Әрбір ата-ана үшін оның баласы беделді университетке түсіп қана қоймай, грантқа ие болуы өте маңызды. Бүгінде Тимирязев ауданының 37 түлегі білім грантының иегері атанды. Бұл өткен жылғы көрсеткіштен 10 % жоғары», — деді аудан әкімі.
Қазір Тимирязев ауданының мектептерінде 416 педагог жұмыс істейді. Оның 69 % -да педагогикалық шеберлік категориялары болса, 86,5 % -да жоғары білімі бар. Санаты жоқ мұғалімдер саны 25 адамға артқан.
Білім бөлімінде қазір 11 бос жұмыс орны бар. 2010 жылдан бері жұмыс істеп келе жатқан «Дипломмен ауылға» бағдарламасы бойынша 311 адам көтерме жәрдемақы алған. Оның 219-ы немесе 70% мұғалім. Оларға 42 млн теңгеден астам қаражат берілді.
«Биыл ауданда төрт мектеп пен бір балабақша жөнделді. Осы мақсатқа деп 657 млн теңгеден астам қаражат жұмсалды. Басқа білім беру объектілерін күрделі жөндеу елді мекендердің болашағына байланысты болады. Бұл бағытты округ әкімдері өз мойнына алуы тиіс», — деді Тимирязев ауданының әкімі.
Сондай-ақ ауданда мектептерді жаңғырту жұмыстары жүргізілуде. Оның аясында кітапханаларды, асханаларды, жиһаздарды, спорттық құралдарды жаңарту, пәндік кабинеттерді сатып алу көзделген. Оқу орындарында 48 физика, химия және биология кабинеттері жаңартылды.
Тимирязев ауданында балалардың мектептердегі қауіпсіздігіне көп мән беріледі. Барлық оқу орындары бейнебақылау камераларымен жабдықталған.
«2024-2025 жылдарға арналған қауіпсіздік жол картасын бекіттім. Округ әкімдері қаңғыбас иттерді аулауды, көшелерді жарықтандыруды, темір жол өткелдерін және т.б. қамтитын қауіпсіздік мәселелерін бақылауға алуы керек. Бұл мәселеге біз елді мекендерді абаттандыру аясында да оралатын боламыз», — деді Ерлан Жаров.
Оның айтуынша, жедел басқару орталығына тек үш мектеп қосылған: Тимирязев ауылының Ақжан, Жарқын және Тимирязев ауылындағы гимназия. Қалғандары интернеттің нашар болуына байланысты қосылмаған. Білім бөлімінің басшысына бұл кемшілікті 20 қыркүйекке дейін жоюды тапсырды.
Тимирязев ауданында барлығы 18 мектеп бар, оның төртеуі негізгі, екеуі бастауыш, мектеп-интернат және 11 орта мектеп.
Тамыз кеңесінде аудан мен облыстың білім беру саласын дамытуға қосқан зор үлесі үшін бірқатар педагогтар марапатталды.
Өткен оқу жылында Тимирязев ауданының оқушылары жетістіктерімен қуантты. Оқушылардың білімі мен дағдыларын анықтауға тестілеу жүргізу кезінде үшінші сынып оқушылары Солтүстік Қазақстан облысы бойынша үздік нәтижелер көрсетті.
Жаңа оқу жылында Тимирязев ауданында 1 428 оқушы мектеп табалдырығын аттайды. Олардың жүзден астамы бірінші сыныпқа барады.
Тағы оқыңыз: Петропавлда мектеп мұғалімі мен бас есепші айына үш рет жалақы алып отырған
