Қызылжар ауданында су тасқынынан зардап шеккен ауыл жұртшылығына тұрғын үй беру және суға батқан, жоғалған мал үшін өтемақы төлеу жұмыстары жалғасуда. Бүгінде ауданда қираған баспананың орнына 60 үй сатып алынған, деп хабарлайды Qazaqstan Media тілшісі.
Өңірге іс-сапармен келген Мәжіліс депутаты Дмитрий Колода тасқын судан зардап шеккен Ольшанка, Вишневка, Соколовка және Вагулино ауылдарының тұрғындарымен кездесті. Бүгіндері ауданның кей тұрғындарына дайын үй берілсе, қалғандары баспанасын қалпына келтіруге материалдық көмек алған. Қазір жөндеу жұмыстарын жүргізіп жатыр. Жалпы, Қызылжар ауданында 1546 үй зардап шекті.
«Су тасқыны кезінде құрылған комиссия үкіметтің қаулысымен бекітілген заң бойынша жұмыс атқарып жатыр. Қызылжар ауданында сатып алынатын тұрғын үйдің 1 шаршы метрі 90 мыңнан басталып 283 мың теңгеге дейін жетеді. Мамандар үйді баспананың орналасқан жері негізінде бағалайды. Осы орайда суға кеткен үйдің ауданы мен отбасы мүшелері міндетті түрде ескеріледі», – деп атап өтті Дмитрий Колода.
Бұдан басқа, Қызылжар ауданында суға батқан, жоғалған мал үшін өтемақы 2,4 млн теңге мөлшерінде төленіп, 100%-ға орындалды. Жалпы су тасқыны кезінде аталған ауданда 27 бас мал қырылған.
Тағы оқыңыз: Петропавлда биыл 32 зейнеткер және 13 жасөспірім отбасын құрған
