Елімізде биыл үйқамаққа алынғандардың 60 пайызына электронды білезік тағылыпты. Ал, осыдан үш жыл бұрын бұл көрсеткіш үш пайыздан аспаған. Сонымен қатар, үйқамағын таңдау үкімі де екі есеге өскен, деп жазады Qazaqstan Media.
Шартты түрде мерзімінен бұрын босату және жазаның өтелмеген бөлігін жазаның неғұрлым жеңіл түрімен ауыстыру туралы Жоғарғы Сотта өткен жиында айтылды. Дөңгелек үстел барысында соттардың қамауға алуға санкция беруден бас тартуының үлестік пайызы жыл сайын тұрақты өсіп келе жатқаны айтылды.
Мәселен, 2021 жылы соттар қамауға алу туралы өтінішхаттардың 90%-ға жуығын қанағаттандырса, 2024 жылы – тек 75%-ын ғана қанағаттандырған. Сонымен бірге, сотталғандарды үйқамақ пен кепілге алу жиі қолданылып келеді екен. 2021 жылмен салыстырғанда үйқамағын таңдау 860-тан 1911-ға дейін немесе екі еседен астамға, ал кепілге алу — төрт есеге өсті.
«Биыл Жоғарғы Соттың бастамасымен электронды білезік деп аталатындарды қолдану жобасы қолға алынды. 2024 жылы электронды бақылау құралдары үйқамаққа алынғандардың 60 пайызында қолданылған болса, 2021 жылы бұл көрсеткіш 3 пайыздан аспаған. Биылғы 10 айда ғана соттар тарапынан 505 электронды білезік қоданылды» — деп баяндады Жоғарғы Соттың қылмыстық істер жөніндегі сот алқасының төрағасы Назгүл Рахметуллина.
Тағы оқыңыз: Елімізде үйге кезекке тұру тәртібі өзгерді