Мемлекет басшысы Қасым-Жомарт Тоқаевтың су тасқыны салдарынан қалыптасқан ауыр жағдайға байланысты қазақстандықтарға үндеу жариялады, деп хабарлайды Qazaqstan Media тілшісі.
Су тасқынына байланысты еліміздің он аймағында, яғни Абай, Ақмола, Ақтөбе, Атырау, Батыс Қазақстан, Қарағанды, Қостанай, Павлодар, Солтүстік Қазақстан және Ұлытау облыстарында төтенше жағдай жарияланды. Қазіргі уақытта барлық өңірде ТЖ қызметкерлері күшейтілген режимде жұмыс істеп жатыр. Осыған байланысты Мемлекет басшысы халықты дүрбелеңге түспеуге шақырды. Құтқарушыларға, тәртіп сақшыларына, волонтерлерге және апатпен күресуге атсалысып жатқан барша жұртқа өз алғысын білдірді.
«Жағдай өте күрделі болса да, біз қиындықты міндетті түрде еңсереміз, барлығын қалпына келтіреміз. Ең бастысы – азаматтардың амандығы. Тасқын судан зардап шеккен азаматтарға айтарым, мемлекет бірде-бір адамды ескерусіз қалдырмайды. Баршаңызға қаржылық және басқа да көмек беріледі. Материалдық шығындар толық өтеледі», — деді Қасым-Жомарт Тоқаев.
Сонымен қатар, президент өз үндеуінде апаттың алдын алу жұмысындағы кемшіліктен бастап, су шаруашылығы мамандарының тапшы болуы, табиғатқа немқұрайлы қарауға дейін көп мәселені реттеу қажет екенін айтты. Үкімет және жергілікті атқарушы органдар су тасқынымен күресті тиімді үйлестіріп отыруға тиіс. Су басқан аумақтарда құқықтық тәртіпті қамтамасыз ету қажет деді ол.
Тағы оқыңыз:Елімізде мамыр айында әскери шеру болмайды
