Жамбыл ауданында «Солтүстік–2026» қысқы спорт мерекесі басталды

Жамбыл ауданында ауқымды «Солтүстік–2026» қысқы спорт мерекесі өз бастауын алды. Пресновка ауылы өңірдің барлық 13 ауданынан келген командаларды қарсы алды. Алдағы үш күн бойы ауыл спортшылары төрт спорт түрі бойынша өз аудандарының намысын қорғайды, деп хабарлайды Qazaqstan Media.

Облыстық дене шынықтыру және спорт басқармасының басшысы Қарлығаш Рамазанова бұл спорт мерекесінің дәстүрге айналғанын атап өтті. Биыл құрметті қонақтарды қабылдау кезегі Жамбыл ауданына бұйырды. Ұйымдастырушылар жарыстарды өткізу үшін барлық қажетті жағдайды жасаған.

Айта кету керек, жарыста тек медальдар ғана сарапқа салынбайды. Әр спортшының нәтижесі жалпыкомандалық есепке қосылады. Бұл ұпайлар аудан әкімдерінің рейтингіне тікелей әсер етеді. Сондықтан әрбір ұпай үшін тартыс өте қызу. Бағдарламада классикалық шаңғы жарысы мен хоккейден бөлек, заманауи керлинг те бар.

Жарыстың алғашқы күні шаңғы жарысымен басталды. Сайысқа жүзден астам спортшы шықты. Қатысушылардың арасында аққайыңдық Анастасия Спиридонова да бар. Ол медициналық университетте тіс дәрігері мамандығы бойынша білім алуда. Соған қарамастан туған өлкесін қолдау үшін жарысқа арнайы келген.

«Мен шаңғымен бес жыл айналыстым, кейін үзіліс жасадым. Қатысуға шақырғанда қуана келістім. Бес шақырым қашықтықты жүгіріп өттім. 58-ші нөмірмен шықтым. Ол мен үшін сәтті сан. Трасса өте жақсы дайындалған, қарсыластар да мықты. Алда тағы бес шақырымдық жарыс пен эстафета бар», — деді Анастасия.

Шаңғы жарысының бас төрешісі Владимир Щербаков Петропавл қаласынан келген. Ол да жарыстың жоғары деңгейде ұйымдастырылғанын айтты.

«Масс-старттың алғашқы кезеңіне 118 адам қатысуда. Ерлер мен әйелдер еркін стильде 5 және 10 шақырымдық қашықтықтарға жарысады. Барлық 13 аудан өздерінің үздік шаңғышыларын жіберген. Алда із қуу жарысы мен эстафеталар бар», — деді төреші.

Мағжан Жұмабаев ауданы атынан келген Жәнел Нұралина жақында қысқы көпсайыстан Қазақстан чемпионы атанып, спорт шебері атағын иеленген.

«Мен спортқа 2018 жылы кездейсоқ келдім. Қазір бес шақырымдық масс-стартта жетінші орын алдым. Нәтижем — 16 минут 37 секунд. Мақсатым — командама көбірек ұпай әкелу. Мен Петропавлда дене шынықтыру және спорт факультетінде оқимын, спорт — менің өмірім», — деді Жанель.

Мұз айдынында да тартыс қызу. Шорт-тректе 78 спортшы бақ сынауда. Бас төреші Виталий Загородко
спортшылардың дайындығын жоғары бағалады.

«Бізде 500 метр қашықтықта жарыс өтуде. Мұз сапалы дайындалған, қауіпсіздік шаралары сақталған. Қазір фавориттер қатарында Аққайың және Қызылжар аудандары бар», — деді ол.

Шал ақын ауданынан келген 19 жастағы Диана Ержанова коньки спортымен төрт жылдан бері айналысады. Ол Солтүстік Қазақстанның танымал спортшылары — апалы-сіңлілі Шумековалардың анасынан тәлім алады. Футзал жарыстары заманауи «Жас Кыран» спорт кешені» кешенінде өтуде. Жергілікті команданың қақпашысы Радмир Галимов алғашқы ойынның 1:1 есебімен тең аяқталғанын айтты.

Алдағы күндері жарыстар жалғасады.
21 ақпанда хоккей мен футзалдан шешуші матчтар, шаңғышылардың із қуу жарысы және шорт-тректен 300 метр қашықтықтағы бәсеке өтеді.
22 ақпанда командалық спорт түрлерінен финалдық ойындар ұйымдастырылады. Бағдарламаны шаңғышылар мен конькишілердің әсерлі эстафеталары қорытындылайды.
Салтанатты жабылу рәсімі мен жеңімпаздарды марапаттау 22 ақпанда жергілікті Мәдениет үйінде өтеді.

Тағы оқыңыз: Надежда Морозоваға бірге жанкүйер болайық!